အဲ့သည်နေ့ အဲ့သည်နေရာ

အဲ့သည်နေ့ အဲ့သည်နေရာ

နှလုံးသားက ထုံထုံထိုင်းထိုင်း
စိတ်တွေက မှုန်မှုန်မှိုင်းမှိုင်းနဲ့
ကာရံမညီတဲ့ကဗျာတွေ ရေးဖို့ကြိုးစား
တီးတိုးစကားတွေ လေထဲလွင့်လာတဲ့ည
သံသယတွေကတော့ ရင်ထဲအပြည့်ပေါ့ . . .

မနေ့ကလည်း ဒီနေ့လိုပဲ
ဒီနေ့လည်း မနေ့ကလိုပဲ
သည်လိုနဲ့ . . .
မနက်ဖြန်ကို မတွေးဖြစ်တော့ဘူး . . .

ပန်းမပွင့်တဲ့ဥယျာဉ်မို့
လိပ်ပြာတို့ မဝဲကြ
ပျားပိတုန်းတို့ မပျော်ကြ . .
ကြာမရှိတဲ့ကန်မို့
ငါးတို့မမြူး ဖားတို့မမြည် . .
သည်လိုနဲ့ . .
ငှက်တို့ပါ တေးမသီကြတော့ဘူး . . .

အပူမီးနဲ့ကျွမ်းခဲ့ကြသမို့
အယူသီးမှုတို့ ခေတ်စားလာခဲ့ကြ
ကိုယ့်ဒူးတောင် ကိုယ်မယုံရမှတော့
အချစ်တွေလည်း ရက်လွန်ကုန်ကြပေါ့ . . .

ပျော်ရာမှာမကျ
တော်ရာလည်းမရောက်
ကံကြမ္မာပစ်ချရာရောက်ခဲ့
အနောက်နဲ့အရှေ့
ကမ္ဘာကုန်ကျယ်သရွေ့ဆိုပေမယ့်
ချစ်ခဲ့ရတဲ့မြေ
တစ်နေရာတည်းရယ်ပါ . . .

အဲ့သည်နေရာမှာ . .
တစပြင်လို တိတ်ဆိတ်မှုတို့ ကြီးစိုးချင် ကြီးစိုးနေမယ်။
အဲ့သည်နေရာမှာ . .
စစ်တလင်းပြင်လို ယမ်းခိုးတွေ ဝေချင်ဝေနေမယ်။
အဲ့သည်နေရာမှာ . .
အာကာသတွင်းနက်တွေလို နက်ရှိုင်းမှုတွေ သိပ်သည်းချင် သိပ်သည်းနေမယ်။
အဲ့သည်နေရာမှာ . .
ပေါင်းစည်းသီအိုရီလို ဖြေရှင်းမရတဲ့ ပုစ္ဆာတွေ ရှိချင်ရှိနေမယ်။
အဲ့သည်နေရာမှာ . .
ဟင်းလင်းပြင်လို ဘာဆိုဘာမှ မရှိတာလည်း ဖြစ်ချင်ဖြစ်မယ်။
အဲ့သည်နေရာမှာ . .
ဣစ္ဆာသယပြည့်ဝလို့ လိုသမျှအကုန် ရနေတာလည်း ဖြစ်ချင်ဖြစ်မယ်။
အဲ့သည်နေရာမှာ . .
. . . . . . . . .

ဘာပဲဖြစ်ဖြစ်
မျှော်လင့်ချက် မဝံ့မရဲထား
ပုစ္ဆာတွေအားလုံးရှင်း သံသယတွေ ကင်းမယ့်နေ့ . . .
ပန်းပေါင်းစုံပွင့် ဥယျာဉ်သစ်ဖြစ်မယ့်နေ့ . . .
မနက်ဖြန်ဆိုတာတွေး အိပ်မက်သူဌေးဖြစ်မယ့်နေ့ . . .

အဲ့သည်နေ့ အဲ့သည်နေရာမှာ

ကဗျာတွေကို ကာရံပြန်ရှာကြမယ် . . . ။

ငြိမ်းနိုင်
၁၆.၄.၂ဝ၁ဝ
မဟာသင်္ကြန်အတက်နေ့

(မြန်မာ့မျှားနတ်မောင် ဖိုရမ် မှ ကူးယူဖော်ပြပါသည်။)
Photo : specialevents.com

.